الغلطة رقم 13 في سلسلة "أخطاء البداية": إني كنت بتشتت، ومكنتش بحترم حجم الشركة وقتها.

حماس لكل فكرة مبهرة

في بدايات ضروري، كنت ممكن أقابل مشروع كبير، أو أسمع فكرة جديدة ومبهرة، فأتحمس جدًا إننا ننفذها.

والمشكلة إني كنت بخلط بين حاجتين: إني فاهم الفكرة… وإننا قادرين ننفذها.

ممكن تكون الفكرة منطقية ومفهومة، وأكون عارف بالضبط العميل محتاج إيه. لكن السؤال الحقيقي كان:

  • هل الأدوات اللي عندنا تسمح؟
  • هل عندنا الخبرة التقنية الكافية؟
  • هل فريق ضروري وحجمها وقتها يقدروا يستوعبوا مشروع بالحجم ده؟

والإجابة: مش بالضرورة.

مشاريع أكبر من إمكانياتنا

وفعلًا دخلنا مشاريع كانت أكبر من إمكانياتنا وخبراتنا في الوقت ده. وده كان بيشتتنا، ويستهلك وقت ومجهود أكبر من اللازم، وأحيانًا كان على حساب شغل تاني كنا نقدر ننجزه بشكل أفضل بكتير.

إنك تفهم الفكرة حاجة، وإنك تقدر تنفذها بالأدوات والخبرة والفريق اللي معاك حاجة تانية خالص.

اللي اتعلمته

  1. مش كل فرصة لازم ندخلها. ومش كل فكرة حلوة لازم ننفذها. أحيانًا الاعتذار عن مشروع بيكون هو القرار الصح.
  2. اعرف حجم إمكانياتك الحقيقية. قيّم قدراتك وأدواتك وخبراتك بصدق قبل ما توعد العميل بأي حاجة.
  3. النمو لازم يكون تدريجي. كل مرحلة في عمر الشركة ليها حجم مشاريع يناسبها، ولازم نبني خبرتنا وفريقنا وأدواتنا الأول قبل ما ننتقل للمرحلة اللي بعدها.

الخلاصة

الطموح مهم جدًا، لكن الطموح من غير تقدير حقيقي للإمكانيات ممكن يتحول لتشتت واستنزاف.

والمطلوب مش إن ضروري تفضل صغيرة، بالعكس… المطلوب إننا نكبر، بس نكبر صح.

وإنت… اعتذرت قبل كده عن مشروع كان أكبر منك؟ ولا دخلته واتعلمت بالطريقة الصعبة؟

محتاج حد يختصر عليك الطريق؟

لو بتبني بيزنس أو سيستم من الصفر وعايز تتجنب الأخطاء دي من البداية، كلمنا مباشرة.

كلمنا على واتساب

اتعرّف أكتر على علاء سمير، مؤسس ضروري، أو ابعتلنا رسالة من صفحة التواصل.

سلسلة أخطاء البداية

  1. الحلقة 1: التعيين قبل ما الشغل يثبت: أغلى غلطة في بدايتي
  2. الحلقة 2: التجويد قبل ما الـ Cycle تخلص: لما حتة واحدة تأخّر المشروع كله
  3. الحلقة 3: "عطل فني": الإجابة المبهمة اللي كانت هتكلّفنا عملاءنا
  4. الحلقة 4: مفيش إجازة ليك كشخص: لما الانهيار ييجي في أسوأ توقيت
  5. الحلقة 5: كلمة العميل مش كفاية: ليه كل مرحلة محتاجة موافقة مكتوبة
  6. الحلقة 6: إمكانيات أكتر مش معناها سيستم أحسن: غلطة إنك تبني كل حاجة والعميل مش محتاجها
  7. الحلقة 7: بوست واحد قفل السيرفر كله: غلطة إنك تستضيف عملاء من غير باك أب برّه السيرفر
  8. الحلقة 9: اهتميت بالكود ونسيت المستخدم: ليه الـ UI والـ UX مش مرحلة تجميل
  9. الحلقة 10: باب النجار مخلّع: ليه موقع شركة البرمجيات لازم يفضل بيتطور باستمرار
  10. الحلقة 11: معلومة بسيطة متستاهلش؟ ليه اللي إنت شايفه بديهي ممكن يختصر الطريق على غيرك
  11. الحلقة 12: حساب مطورين من 2017 اتقفل بقرار واحد: افهم سياسات المنصة قبل ما توافق
  12. الحلقة 13: فاهم الفكرة مش معناها إنك قادر تنفذها: إزاي المشاريع الأكبر مننا شتتت الشركة