"سيرفرك اتقفل، وهيتمسح خلال 24 ساعة. أي إيميل أو اعتراض مالوش لازمة، ومش هنرجعلك أي مبالغ، وإنت في البلاك ليست مدى الحياة." دي كانت رسالة جاتلي من الداتا سنتر، ودي الحلقة السابعة من سلسلة "أخطاء البداية".

أول سنة مع السيرفرات

الرسالة دي جاتلي سنة 2008، في أول سنة بدأت أشتغل فيها على السيرفرات. كان عندي سيرفر Dedicated، ومستضيف عليه مواقع عملاء.

واحد من العملاء دول كان عامل منتدى. المنتديات وقتها كانت زي فيسبوك بس أبسط بكتير: حد يكتب بوست، والناس تدخل ترد عليه.

بوست واحد علشان التفاعل

علشان يزوّد التفاعل على المنتدى، العميل نزّل بوست فيه أرقام كريدت كاردز. الأرقام كانت وهمية، لكن شكلها حقيقي: 16 رقم، وCVV، وتاريخ انتهاء.

جوجل أرشف الصفحة، وبلّغ الداتا سنتر إن الدومين المستضاف عندهم عليه بيانات كروت مسروقة. والداتا سنتر ما سألش، وقفل السيرفر كله، بكل المواقع اللي عليه.

وأنا قاعد مش فاهم المطلوب مني إيه، وبحاول أدخل على السيرفر، ومفيش أي استجابة.

إزاي الداتا اتنقذت

هنا ربنا ستر. كان عندي عميل تاني واخد VPS في نفس الداتا سنتر، ونفس الفرع في أمريكا.

استأذنته، ودخلت على السيرفر بتاعه، وجربت أوصل لسيرفري من الشبكة الداخلية. واتضح إنهم قافلين السيرفر من الإنترنت بس، لكن من جوه الشبكة لسه شغال.

ضغطت كل الداتا، ونقلتها، وطلبت سيرفر جديد.

لو العميل ده ما كانش موجود في نفس المكان بالصدفة، كانت داتا كل عملائي راحت.

تلات دروس اتعلمتها

  1. الباك أب لازم يكون برّه السيرفر. في مكان تاني خالص، عند مزود تاني. الباك أب اللي على نفس السيرفر بيقع مع السيرفر.
  2. خلي بالك مين اللي بتستضيفه عندك. أي محتوى أو مخالفة من عميل مستضاف عندك هتتحسب عليك إنت، وعلى كل العملاء اللي معاه على نفس السيرفر.
  3. حدد المسؤولية بينك وبين العميل من الأول، ومكتوبة. مين مسؤول عن المحتوى، ومين مسؤول عن الباك أب. ولو العميل مسؤول عن الباك أب بتاعه، يبقى ده متفق عليه وواضح من البداية.

الخلاصة

ما تستسهلش أي حاجة تقدر تعملها في شغلك. بوست واحد من عميل ممكن يقفل شغلك كله في ليلة، ومن غير باك أب برّه السيرفر، المشكلة دي ممكن ما يبقالهاش حل.

محتاج حد يختصر عليك الطريق؟

لو بتبني بيزنس أو سيستم من الصفر وعايز تتجنب الأخطاء دي من البداية، كلمنا مباشرة.

كلمنا على واتساب

اتعرّف أكتر على علاء سمير، مؤسس ضروري، أو ابعتلنا رسالة من صفحة التواصل.