الغلطة العاشرة في سلسلة "أخطاء البداية": إني مكنتش مهتم بموقع الشركة وتطويره باستمرار.

موقع بنعمله مرة… وخلاص

كنت بعتبر إن موقع الشركة حاجة بنعملها مرة واحدة: نحط فيها نبذة عن الشركة، والخدمات، وبيانات التواصل، وخلاص كده.

وممكن تعدي شهور وسنين من غير ما نحدّث المحتوى، أو نضيف الخدمات الجديدة اللي بقينا بنقدمها، أو نطوّر شكل الموقع والتقنيات اللي مبني بيها.

لكن مع الوقت اكتشفت إن الموضوع أكبر من كده بكتير، خصوصاً لما تكون شركة برمجيات.

باب النجار مخلّع

إنت بتبيع للعميل خبرتك في التكنولوجيا، وبتقنعه إنك تقدر تعمل له موقع أو نظام يواكب تطور شغله.

وفي نفس الوقت، موقع شركتك نفسها قديم، ومش متحدث، ومش بيعكس مستواك الحقيقي.

وهنا ينطبق المثل بالظبط: باب النجار مخلّع.

العميل بيقرا الرسالة من غير ما تقولها

والأخطر من الانطباع السيئ، إن العميل ممكن يفهم إنك إنت نفسك مش مقتنع بأهمية المواقع الإلكترونية:

"طالما الشركة اللي بتبيعلي مواقع مش مهتمة بموقعها، أنا ليه أعمل موقع لشركتي من الأساس؟"

وساعتها إنت مش بس بتضيّع فرصة شغل، إنت ممكن تكون بتفقده الثقة في الخدمة نفسها اللي بتبيعها.

اللي اتعلمته

  1. الموقع دليل، مش ديكور. هو مش مجرد واجهة شكلها حلو؛ ده دليل عملي على خبرتك، وطريقة تفكيرك، واهتمامك بالتفاصيل.
  2. الموقع لازم يكبر مع الشركة. كل خدمة جديدة، وكل خبرة، وكل تقنية الشركة بتكتسبها، لازم تنعكس عليه.
  3. الأساسيات مش اختيارية. لازم نهتم بسرعة الموقع، وتجربة المستخدم، والمحتوى، والأمان، وظهوره في محركات البحث.

الخلاصة

موقع الشركة مش مشروع بننفذه ونقفل ملفه؛ ده جزء من شغل الشركة نفسه، ولازم يفضل بيتطور باستمرار.

لأنك ببساطة مش هتقدر تقنع عميل بأهمية وجوده على الإنترنت، وإنت مش بتطبق الكلام ده على نفسك.

وإنت… موقع شركتك آخر مرة اتحدث إمتى؟

محتاج حد يختصر عليك الطريق؟

لو بتبني بيزنس أو سيستم من الصفر وعايز تتجنب الأخطاء دي من البداية، كلمنا مباشرة.

كلمنا على واتساب

اتعرّف أكتر على علاء سمير، مؤسس ضروري، أو ابعتلنا رسالة من صفحة التواصل.