الغلطة السادسة اللي وقعت فيها: إني افتكرت إن كل ما أعمل سيستم بإمكانيات أكتر، يبقى أنا بعمل سيستم أحسن. ودي الحلقة السادسة من سلسلة "أخطاء البداية".

عميل جديد في مجال جديد

اشتغلت مع عميل لسه بيبدأ في مجال جديد بالنسبة له، وأنا كمان ماكنتش نفّذت قبل كده سيستم متخصص في النشاط ده.

فبدأنا نفكر مع بعض، وكل يوم نطلع بفكرة جديدة ونضيف Feature جديدة. وكنت مبسوط جدًا إننا بنعمل حاجة متطورة ومميزة تقنيًا، ومحدش عمل زيها.

لما السيستم نزل الشغل الحقيقي

لكن أول ما السيستم نزل الشغل الحقيقي، اكتشفنا إن مش كل الأفكار دي البيزنس محتاجها فعلًا. في حاجات تعبنا في تنفيذها، لكن محدش بيستخدمها لأنها مش بتحل مشكلة حقيقية عند العميل.

وفي المقابل، كان في حاجات أساسية الموظفين محتاجينها كل يوم، وماكانتش في دماغنا أصلًا.

آلة حاسبة علمية على كاشير سوبر ماركت

فاكر الآلة الحاسبة العلمية اللي كنا بنستخدمها في ثانوية عامة؟ اللي فيها Sin وCos وTan، وزراير كتير محدش فاهمها.

تخيل بقى إنك حطيتها على كاشير سوبر ماركت. هل صاحب السوبر ماركت محتاج كل الإمكانيات دي؟ طبعًا لأ.

هو محتاج آلة حاسبة بسيطة، زراير كبيرة وواضحة، فيها العمليات الأساسية، وفيها زرار 00 وزرار 000 علشان يكتب الأرقام الكبيرة بسرعة.

الآلة التانية إمكانياتها أقل بكتير، لكنها أنسب وأسرع في شغل السوبر ماركت.

تلات حاجات قبل ما تضيف أي Feature

  1. افهم الشغل بيمشي إزاي على أرض الواقع. يوم بيوم، مع الناس اللي هتشتغل على السيستم، مش من ورا المكتب.
  2. شوف الأنظمة اللي شغالة فعلًا في نفس المجال. اللي فضل مستخدم فيها سنين غالبًا هو اللي الناس محتاجاه بجد.
  3. اتكلم مع ناس عندها خبرة في المجال. ومع اللي هيستخدموا السيستم نفسهم، لأنهم أكتر ناس عارفين إيه اللي بيعطّلهم.

الخلاصة

نجاح السيستم مش في عدد الإمكانيات اللي فيه. نجاحه في إنه يدّي المستخدم الأدوات اللي محتاجها فعلًا، ويخلّص شغله بأبسط وأسهل طريقة.

محتاج حد يختصر عليك الطريق؟

لو بتبني بيزنس أو سيستم من الصفر وعايز تتجنب الأخطاء دي من البداية، كلمنا مباشرة.

كلمنا على واتساب

اتعرّف أكتر على علاء سمير، مؤسس ضروري، أو ابعتلنا رسالة من صفحة التواصل.